admin
Admin
عدد المساهمات : 517
نقاط : 19253
تاريخ التسجيل : 22/08/2011
العمر : 27
 | | موضوع: شعر عن وزارة الداخلية المصرية الأربعاء أغسطس 31, 2011 6:41 am | |
| وقول مين موتك ومين ضربك
وقول مين عذبك ومين قهرك
قول مين ذالك ومين سحلك
قول مين جاب أجلك
بيقولوا الداخلية برئية من دمك
هو انت تطلع مين بسلامتك
كل يوم فية كتير زايك
ويمكن كمان أكتر منك
ماهو دة أهم فوائد الامن والنظام
أنها تحرق قلبك
أنها تقهرك فى قعر بطنك
أنها تصغرك وتحتكرك
أنها تقصف عمرك
انها تكسر عضمك
أنها تخرب بيتك وتحزن أهلك
يا خالد أطلع من قبرك
والله حتى لو طلعت
والله لو بعد الموت نطقت
ماحد هيسمعلك
هو انت لما كنت بتموت
كان مين رحمك
كان مين سمعك
ياخالد قوم من قبرك
يمكن نقوموا من بعدك؟؟؟؟؟؟؟؟؟؟؟؟؟؟؟؟؟؟؟؟؟
يمكن نقوموا من بعدك؟؟؟؟؟؟؟؟؟؟؟؟؟؟؟؟
مش انت لوحدك اللى مت
دا احنا كلنا ميتين من قبلك
يمكن نقدروا نأخدوا حقنا وحقك
كل الناس اللى شاهدوا
محدش سمعهم طظ فى كلامهم
هما ما بيسمعوش غير نفسهم
التقارير كلها جاهزة عندهم
بيقولوا انك مسجل خطر من زمان
و عليك قواضى وعليك احكام
هربان من الخدمة العسكرية مشكوك فى أمرك
وبعت بلدك وغيرت دينك وغيرت اسمك
وقالوا كلام بعيد عنك
وكأنهم عايزين مكافاة قتلك؟؟؟؟؟؟
كويس انهم ريحوا البشرية منك
صورتك فى الاهرام
وانت عاوج السيجارة
وحالق شعرك
قصدهم يقولوا ان قتلك حلال
ياترى هتدفعوا للداخلية كام؟؟؟؟؟؟؟؟؟
شوفت الكلام
هما دول اللى يستاهلوا الاعدام
ربنا يرحمك ياخالد وربنا لوحدة
اللى يقدر يأخد حقك
تقرير الطب الشرعى اول وتانى
بيقول ان البانجو عملك احتباس حرارى
اه يا نارى
هما يعنى هيغلبوا ما هما اتعودا
وكل الجرايد الحكومية بتقول انك مفترى
وحتى وانت ميت على الناس بتفترى
وأنت اللى خنقت نفسك بنفسك
وأنت اللى كسرت ضلوعك وكسرت الجمجمة
ومحدش فيهم جه ناحيتك ولا لمسك ولا قالك مرحبا
انت اللى طحنت نفسك بنفسك ودخلت المفرمة
وظلمت المخبرين علشان مهما ناس طيبة
والواحد فيهم ايدية مطرحتين ناس متفصلة
انا عارف ان القضية مش قضية مخبرين
القضية قضية شعب كاتم
وساكت وشايل الطين
وميعرفش حقة فين
طول عمره مكسور الجناح ومطاطى الجبين
ولا لية فى الطور ولا فى الطحين
معندوش ارادة طيب هو هيجيب الارادة منين
وصورة خالد قدامة عينية عينه
القضية قضية دولة عدوها الاول هو شعبها
ودايما شيفاه حمل تقيل على قلبها
وعايزة تخلص منه ومش عارفة تودية فين ؟؟؟؟؟؟؟؟؟؟؟؟؟؟؟
وبتعمل أى حاجة فية كأنه حقها
ربنا يقدرها وكتر الف خيرها
و فعلا الداخلية شايفة شغلها
والشعب هو همها ولا حد تانى يهمها
وكلنا متهمين وشوفوا خالد راح فين
من غير اى ذنب وأسألوا رجال الامن
هيطلع احنا اللى علينا الحق
واحنا اللى نستاهلوا الموت والتعذيب
واحنا اللى نستاهلوا الشنق
هما بشاوات ولاد بشاوات
واحنا ولاد ستين كلب
ربنا ينتقم منكم
الدنيا مش دايما لحد
وأرجع وأقول الحق على الشعب
طول عمره بيتألم من غيركلام
أخرص عاجز ذليل جبان
شايفين الظلم وساكتين
شايفين القهر والذل والهوان
نفسى أفهم على أية راضيين
شوفوا العالم فين وأحنا فين
لازم نتحركوا لازم نصرخوا
لازم نقوللهم ان أحنا موجودين
قضية خالد سعيد قضية الملايين
قضية خالد سعيد قضية شعب حزين
كان أسمه خالد وهيفضل خالد على مر السنين
رغم انف الجاحدين رغم انف الظالمين
من النهاردة لازم يكون لنا كلمة وصوت
يا كدا ينموت يا كدا ينموت
واوعى تخاف من كلمتك
خلى كلمتك سر قوتك
وأصرخ بأعلى صوت
أوعى يقتلك السكوت
اوعى تقول عيشة واخرتها الموت
وانت اصلا ميت من سنين
لحد أمتى هنفضلوا ساكتين
لحد أمتى هنفضلوا راضين
الناس بتوع الحكومة والمنافقين
لسة بيقولوا انك شهيد البانجو
كلنا متخدرين كلنا متبنجين
وأنا بقولهم كلامكم اكبر دليل
أنكم كدابين وكلنا عارفين
وكلنا حاسين وكلنا شايفين
بس تقول لمين
تاه صوت الادان
والظلم بقى شيخ قبيلة
وله كيان وبرلمان
والشعب أستحلى الهوان
يأخد على قفاة مفيش مشكلة
دى قمة المرجلة
يموت ماهو ميت من زمان
هو يعنى كان لاعب كورة ولا فنان
دا يدوب انسان
ومصرى كمان
يعنى بالعربى كأنة مكان
يا خالد عايز اقولك كلمة اخيرة
يمكن مت علشان تحيينا
يمكن مت علشان تصحينا
أشكرك يا أجمل أنسان
رغم كل اللى أتقال
هتفضل فى قلوبنا مهما كان
وهتفضل صورتك للحق عنوان
وللظلم عنوان
أحنا عرفينهم كدابين
مهو وخدين على الكدب من زمان
وبينهم اتفاقيات ومعهدات
والجاهل فيهم فى الكدب فنان
مفيش حاجة اسمها تقارير
فى دولة التقارير والتزوير والورق
هو انتم فلحتم الا على الورق
أحنا قلبنا بينحرق
مش معقولة تقتلونا
وتقدموا ورق
فقوا فقوا يابلد
لحد أمتى هنفضلوا ساكتين
نفسى اسأل سؤال البلد دى بلدنا
ولا بلد مين
من النهاردة؟؟؟؟؟؟؟
لازم يكون لنا كلمة وصوت
يا كدا ينموت ياكدا ينموت
خلى كلمتك سر قوتك
أصرخ بأعلى صوت
أوعى يقتلك السكوت
أوعى يقتلك السكوت؟؟؟؟؟؟؟
كلنا لازم نقولوا شكرا خالد سعيد
وبكرة هيرجع حقك أكيد
هتفضل شهيد هتفضل شهيد
شكرا خالد سعيد
الشاعر
عبد الحميد بدوى | |
|
